السبت، 29 سبتمبر 2012

سحر الحلال


ضكَت كل العسل من كل الأشكال *

مثل طعمه كلامك  ابد ماشايف *

وكثر ماحلو شهدك زايداهواي *

فاض اوترك لمعه اعلى الشفايف *

من تحجي ابوزن واترتب احروف *

وبحر الشعر منك صبح خايف *

ياومضه وفريده وماجت ابال ؟*

ومن عندك تسولفها سوالف *

الشعر سحر الحلال وماكو إشكال *

بس حرفك خطر حل بالعواطف *

مجنون النصت واتحدى ميطيح *

ولك بوحك صرعني اوانت واكَف *

اوصفت حجيك عسل والعسل خجلان *

كَال انت احرجتني ابهالمواقف *

هذا ابياعسل ياحلو ينقاس ؟ *

ابحلاته الشهد ! مرّه الكَيته حالف *

بطّل عوفني واسكت اذا جاك *

واترك وصفه بيه اعذرني آسف *

هذا القمر ابن اربع طعش بيه *

فضَّل من يشوفه يكون خاسف *

ــــــــــــــــــــــــــــــــــــ
عسى ان تروق لكم احبتي .... باسم الوائلي ....

الاثنين، 24 سبتمبر 2012

ياربي ياعالي

يامبدع الكون ~~ أشكو الك حالي ~~

والقصد مكنون ~~ في وسط دلالي ~~

ياعالم الحال ~~ يَل بيدك احوالي ~~

لي عندك آمآل ~~ بلّغني آمآلي ~~

همّي غزا الروح ~~ ياربي ياعالي ~~

يادوى المجروح ~~ ارحمني بأهوالي ~~

مولايَ نجواي ~~ تِسمعها ياوالي ~~

فيك الرجا ابهاي ~~ تلطف اومَتبالي ~~

يامبدع الكون ~~ أشكو الك حالي ~~

ــــــــــــــــــــــــــــــــــــــــــــــ
//باسم الوائلي //

الخميس، 20 سبتمبر 2012

وريقاتي

لم أجد للمغرور قيد حتى في وريقاتي الصغيرة التي مصيرها الضياع !!

// باسم الوائلي //

أفنيت فرقا

يامُحيِي الجمعات ياصدر رِفقا **

إذ فيك عِلم الآل قد زُق زَقا **
ـــ        ***        ـــ

يَمحرك مشاعر اكثر الناس *

يامَن بالشجاعه تشبه العباس *

يامُحيي الجُمَع وامصحي كل راس *

ياصرح الكرامه ومعنى الاحساس *

يَمخاطب شرائح شتّى واجناس *

منك كل حرف بالذهب ينقاس *
ـــ        ***        ـــ

خاطبتَ كل الناس أفنيتَ فَرقا **

فكرٌ غزا الأفكار غربا"وشرقا **
ـــــــــــــــــــــــــــــــــــــــــــــــــــــ
باسم الوائلي /////////////



الثلاثاء، 18 سبتمبر 2012

يوم اربعينك

يوم اربعينك ياولي * بيّن علينا ياعلي *

يا اخو الهادي المصطفى * ياسر كنوز المعرفه *

بالمحن بعدك نبتلي * بيّن علينا ياعلي *

مَر الزمن بغيابك ~~ بس آلآم لمّن مَر *

كل مانجي المحرابك ~~ كأنك مرتقي المنبر *

ونذكر بُلغة اخطابك ~~ ونذكر خطبة الكوثر *

ونذكر كَلت سِئلوني * من قبل مَتفقدوني *

وقابلنا كل ذاك الوفه * منّا اليصد والّي جفه *

وغدر الانوف التعتلي * بيّن علينا ياعلي *

ـــــــــــــــــــــــــــــــــــــــــــــــــ
أسألكم الدعاء اعزائي ( باسم الوائلي )

السبت، 15 سبتمبر 2012

( فلا )


احيانا" الكلمات تعكس لنا مِزاج كاتبها ..... ولاتعني عموم أخلاقه !!

لأن المِزاج : أشبه مايكون بحالة الطقس ... فلا نستعجل الحكم . //باسم الوائلي//

( أن تكون كتوما")

اذا أصبح لديك صديق فأودعه سرا" صغيرا" .. لايضرك إن افشاه .. وغِب عنه وهلة !

فإذا افشى السرَ ... فلايجب عليك سوى أن تكون كتوما" أمامه !!!

فإن من خانك بالنحاسِ ، سيخونك بالذهبِ لامحال . // باسم الوائلي //

(اللقاء ابواقع المسرح )


يا أجمل لقاء اشلون راح ايكون *

اذا شاء القدر يتعاون او يسمح *

راح تكون حالة يوسف او يعقوب *

وايصير اللقاء ابواقع المسرح *

انت اتشوفني وآني اشوف الشوق *

بجدامك ثكَل !! مني الفكر يسرح *

اكَولن ها حلم وخاف الحلم خلصان *

ومن اكَرص وجنتي إي الم إي صح !

وارد الواقعي واتمعّنك بالشوف *

واذكر وعدي بيك المِن صدك أصبح *

***************
ليتها ترتقي لأذواقكم اعزائي // باسم الوائلي //

الثلاثاء، 11 سبتمبر 2012

أعز من روحي


اعرف آنه روحج مو حجي السان .. لان صدكَيني احس باللي تحسّين *

واشوفن نفسي بأوصافج الي هاي * مثل دمي سريتي اويالشرايين *

وكَلبي يلفظ ابدكَاته كلمات * احبها وما املها ابلحظه لو حين *

وصرت حاير شسميج الفكر حار * واعز من روحي سميتج تعرفين *

كل هذا واكَول امقصر اوياج * ولا وافيت من بحرج  قطرتين * 

ــــــــــــــــــــــــــــــــــــــــــ
باسم الوائلي

ماتركتك

شريتك .... بروحي واعيوني يَعمري .... وبأغلى ماعندي ثمن *

وفيتك .... والصبر مل حتى صبري .... وماتركتك في المحن *

اريدك .. بس توافيني بوعودك بالغرام ******

ابي حب .. ما ابي ضحكه وترد ليّه سلام ******

ب ا س م الوائلي

الأحد، 9 سبتمبر 2012

{ ياقلبي وضي اعيوني }

مقطوعتي لكم اعزائي ( ياقلبي وضي اعيوني )
************************
بدي اياك ابترجعلي * واتنشف دمع اعيوني *

واتسكّت كل عذالي * وكل الناس اللاموني *

جِهلوا شو تعني القبي * حاروا بشو لَيسموني *

وبتمنى ايعرفوا كلَن *إني ابحبك مجنوني *

محبوبي وغالي عليي * ياقلبي وضي اعيوني *

الوحدك تعني حياتي * وغيرك ماعم يعنوني *

ارجع طل ابنورك طل * بهجرك ماطبقوا اجفوني *

فارقني النوم ابهجرك * لتخيّب فيك اظنوني *
ـــــــــــــــــــــــــــــــــــــــــــــــــــــــــ
باسم /// اود ان تعجبكم اعزائي






الجمعة، 7 سبتمبر 2012

{ يا اجمل لُغة }


يالشكلج حلو وعطرج جمال ايفوح * وبيج الخالق أبدع صنعج إتمعّن *

كل نفحة عطر منج تمر واتروح * سبحان البديع اشما خلق اتقن *

يالشالج غصن والغصن اصله ابلوح * ويغذيج ابغذاء امنل حَسِن أحسن *

ابجمال البيج حار الشعر حار البوح * واذا حاولت وصفج احلم اوأنجن *

طاح القلم مني وعل ورق مطروح * ويكَلّي اكتبت بيها اهوايه ماخلصن ؟

ياورده ويَ زهره وفُلّه فوك اسفوح * من حسنج جميلات الحسن خِجلن *

اذا بيضه شمس من بعد جنها اتلوح * واذا حمره عيون الشافج انذهّلن *

واذا طيف الشمس بالوانه الج مسموح * خلّي اخدودج الحلوات يتلوّنن *

يا اجمل لُغه او تستخدمج كل روح * واوراقج معاني حتى لو ذبلن *

ـــــــــــــــــــــــــــــــــــــــــــــــــــــــــــــــــــــــــــــــــــــــــــ.
اتمنى ان ترتقي الى مستوى ذوقكم الرفيع // باسم الوائلي //

الثلاثاء، 4 سبتمبر 2012

هذا ضوه دنيتي

يابحر هونك علي لاتاخد المحبوب .. موتدري كَلبي ترف لو حل فراق يذوب *

يابحر ارحم ولك ذب موجك الصوبي .. لاتجرم ابحالتي ورجعلي محبوبي *

هذا ضوه دنيتي ضوّالي ادروبي .. وآنه بدونه تره بالظلمه اظل محجوب *
انت شمس واتنور واتشع على الكون * لو عندي انت اخفيك عن كل العيون *

السبت، 1 سبتمبر 2012

؟؟؟


أرى ان سعادتي فيك انت ... وفرحتي بك انت ... أين انت ياسعادتي ؟ أين انت يابسمتي ؟ أين انت ؟
 
 انا الذي ظللتُ الطريق ...
 
بلا رفيق ولا فرشة الحرير الرقيق .. ولا تلك المزهرية المرصعة بالعقيق .. أين انت؟

** باسم الوائلي **

انت وآني

انت القرَّرت تبتعد عني * وانت النزلتلي ادموعي ذنّي *

وانت التعرف ابّعدك كتلني * وانت ابهجرك الزيدت ونّي *

وآني اتمسكت بيك وشريتك * وآني شلت الك روحي او نطيتك *

وآني ابعشرتك صادق وفيتك * وآني ابغالي ماعندي فديتك *

وانت امنل بدايه راغب اتبيع * وانت مايهمّك آنه لو اضيع *

وانت الكَتلي ابيعك ماكو ترجيع * وانت بسبب غدرك خايف اتذيع *

وآني احجي بصراحه واحكم اعليك * وآني اعتبر غدرك ثوب العليك *

وآني اتمرضت من قسوة البيك * وآني ابدمع تالي وضحك تاليك *

وانت امنل بدايه امخطط اتعوف * وانت التجرح اوماتقبل اتروف *

وانت ابلا نقط خليت الحروف * وانت الهجر طبعك صار معروف *

وآني الي اخسرت صحتي اوكياني * وآني الي اكبرت من غير أوآني *

وآني الي رعيته مارعاني * وآني الملك كَلبي شو جفاني *

وانت الي طلبته ابقصد ثاني * وانت المارهملك انت وآني *

وانت اسرع شخص شفته نساني * وانت الجفا مَيعطلك ثواني *

ـــــــــــــــــــــــــــــــــــــــــــــــــــــــــــــــــــــــــــــــ

باسم الوائلي //وأأسف مرة اخرى على الكلمات ودي لكم اعزائي