{ ارحميني كَلتلج }

قصيدتي لكم احبتي (ارحميني كَلتلج )
ْْ ْْْ ْْْ

احبّن غيرج انت اشجاي تحجين ؟

مو تدرين كَلبي مايشيل اثنين *

كَلبي امنل زغر انتي الملكتيه *

وبسمج صبح طابو وزين تدرين *

عجيب اليخطر ابالج هالأيام *

عَجَب طغيان لو جن المجانين *

اذا طغيان اهدي اوذكري الله *

واذا مجنونه اقره اعليج ياسين *

ولج حجيج ابد مو حجي عقَال *

لاعرف اليقبله اولا يقبله الدين *

كلبي صار ملكج وانتي ملّاج *

واسمج سره ابدمي بالشرايين *

ودمي مارضه بعروكَي يمشي *

إلا انت بعروكَي كَبله تمشين *

شضم اعليج هالمكشوف امامج *

وعرفتيني ابعشرتج هاي الي سنين *

وفي وما انكر ابطبعج توافين *

اوتجرمين ابمحبتي لو تنكرين *

حال الظيم حالي واهمل الروح *

لو فد يوم من عندي تضوجين *

اضل انهاري حاير تايه البال *

واكضّي الليل اون وَن المساكين *

ولج ما استحق منج قسااااوه *

واذا وكتي قسه هم انت تقسين ؟

ارحميني كَلتلج هيني وياي *

مو ذلَه.. احبج من ترحمين *

مو ذلّه اليحب لو خضع لهواه *

تره الذلّه تصير اويالبعيدين *

ثقي الدنيا ابد متدوم للدوم *

ضيوف احنا عليها وهسه ماشين *

اشوف العِزّه من اتواضع اوياج *

وهيبه الهيبتي لو دِمعت العين *

واريدن منج اتشيلين ال اظنون *

واهم منهن ثقه بيه تخلين *

اكَربي مني اكَربي وعيفي الاوهام *

مو تدرين اموتن من تبعدين *

ْْ ْْْ ْْْ
/ب/و/ اتمنى ان ترتقي الى مستوى ذوقكم الراقي