لسان حال الامام الباقر {ع}

آجركم ربي أحبتي وأعظم لكم الثواب..باسم الوائلي&
*****************
آنه وابسن الطفوله واجهت اصعب ألم *
آنه بعيوني شفتها اشلون حركَوها الخيم *
شفت سوط الضرب زينب واسمعت جدي انشتم *
والهضم كَلبي خواتي يبجن وماكو رحم *
وحده فرّت وين راحت والنظر مني انعدم *
رحت خبرت العقيله والدمع منها انسجم *
انذعرت او نادت عليها عمه موكَلبي انهضم *
وصلت احسين اولكَتها امدده بنحره تشم *
اتكَله بويه كَوم ليه كوم ياراعي الشيم *
تحزن الطفله ابوضعها والله احس كَلبي انجسم *
ـــــــــــــــــــــــــــــــــــــــــــــــــــــــــــ.
باسم الوائلي&عظم الله لكم الاجر اعزائي

صعبه

طبتم أعزائي ولكم مني ...
~~~~~~~~~~
يابويه عني روحتك ..صعبه *
واشلون اعيش ابفركتك .. صعبه *
تشرق اهمومي ابغيبتك .. صعبه *
~~~~~~~~~~~~
بويه وياكم اخذوني شلون ابكَه . بعلتي شلون **؟
هم مرض يابويه بيّه وفوكَه حركَه . من تروحون **
والموادع صرت أجرّه شهكَه شهكَه . بدمع العيون **
آه يافركَة احبابي والله فركَه . عني تمشون **

ابجي ابوداعك والكَلب .. ذايب *
موقف حزن بي كل محب .. ذايب *
راح ابكَه اتاني ورجعتك .. صعبه *

كل شخص منكم سِره حبه اويَدَمّي . شصبر اعليه *؟
بويه خلّولي الطفل عبدالله يمّي . وآنه اداريه *
بيه اردَّن وحشتي واتناسه همي . بعيني اباريه *
من اشيله والله اشم بي ريحة أمي . وأطمئن بيه *

يابويه كَتلك هالطفل .. خلَّه *
وافراكه عِله اعله العلل .. خلّه *
وردك اجاني ابدمعتك .. صعبه *

هذا حالي من ميشيتوا بويه عني . موحشه الدار *
والحنين ابذكرياتي إلّي كتلني . ودمعي بعبار *
بويه كل حجره اطبها يعله وني . بيها تذكار *
هالمرض والفركه بويه دوهننّي . والزمن جار *

مو تدري حسبات الدهر .. يولن *
واهمومي لوعات وقهر .. يولن *
ومن ادخل آني الحجرتك .. صعبه *
~~~~~~~~~~~~~~~~
باسم الوائلي&أسألكم الدعاء بشفاء المرضى

إحاطة طفلة

مساء الحسين (ع )أعزائي ولكم...

اسألت طفله وحجتلي بكل بساطتها **
لجن كل كلمه منها الدمعه روّتها **
~~~~~~~~~~~~~
كَلتلها المصايب بالطفوف اثكَال ؟
كَالت إي ثكَيله اجبال هزتها *
كَلتلها يَ ويلي اشلون واشدار ؟
ردّت آيزينب جرت دمعتها *
ياطفله دَكَولي ابزينب اشصار ؟
كالتلي اذكرت لحسين طبتها *
طبت لبو اليمه والحديث اشجان ؟
بس ماسلمت عبرتها خنكَتها *
خنكَتها واخوها احسين موجود ؟
مو تدري العساكر طوك طوكَتها *
إي وبهالمصيبه الحره شتكَول ؟
يحسين الجيوش اعليك لمتها ؟
عمت عيني اعله اخوها اشجاوب ابهاي ؟
كَال اي يختي تسفك دمي نيتها *
عجب ليلة اموادع تنكَضي ابساع ؟
إي لحظات صارت عدها ليلتها *
جا ليل الموادع يخلص اشلون ؟
إي يخلص لان محفوف باخوتها *
اريد اسأل اوكَلبي شو يدك حيل ؟
كَالت لا لتسأل هاي إجابتها *
كَلتلها عرفتي ابفكري شيدور ؟
كالت عالنفل والكفل جيتها *
كلتلها ابو فاضل موقفه اشجان ؟
نبّت ماترك زينب ابحيرتها *
شيكَلها ابو الغيره اوصاحب الزود ؟
كَال ابشاربي بت علي اوهيبتها *
ولمن صار النهار وحلّت اقدار ؟
كَامت زينب اتودع شبيبتها *
بالله اشحالها ابتوديع الاحباب ؟
فطر كَلبي هضمها المرد جبدتها *
يازينب يَ كبرى اشكَد صبر بيج ؟
إي صبر التحمله امرار موتها *
واحد باثر واحد غابوا إبدور ؟
واجه دور الكَمر والظلمه عمّتها *
مو هو الكفلها اوكَال بحماي ؟
راح ايجيب ماي ايروِّي مهجتها *
ابياحال العقيله اوعافته ايروح ؟
امنكَلوب الاطفال العطش فتتها *
ياويلي اعله زينب راح عباس ؟
إي راح اوطفت انوار دنيتها *
ياطفله اشبكَه الها بعد عباس ؟
آيحسين نادت وامها حضرتها *
حضرتها البتول اوشافت الحال ؟
لكَت زينب تقبِّل صدره وأبجتها *
الله يعينها الزهره وبعد هاي ؟
شمّت نحره واتنفذ وصيتها *
سلام الله اعله نحره واشسده اعليه ؟
وي روحت احسين الحسره جرتها *
كافي لا يطفله لا تقصين !!
خلي انواسي زينبنا ابمصيبتها !!
~~~~~~~~~~~~~
باسم الوائلي&أسألكم الدعاء بشفاء المرضى
****************

منامات صباي

انت الأُنثى التي طالما زارتني في منامات صباي ...

وكم تعبتُ .. إذ تعقبتُ .. تلك العربة التي كانت تقلّك ! العربة البنفسجية المزركشة بخيوط شعرك ..

لم انسى بعد تعلُّقي بسلاسلها تلك المُدلاة امامي كأنها ألأيد التي تُمد إلي لأركب فوق العربة !!

العربة التي لا أرى تحتها أرض !! ولا فوقها سماء !! بل تحيطها أطياف ألوان لم أعهدها قط ...

عندما تسير تلك العربة .. تمتلئ رئتاي بعبير سمعت عن مثله بالجنة ...

فتمهَّلي ايتها الأُنثى .. إرفقي بعربتك وبمن تَعَلَقَ بها .........ب ا س م الوائلي*

أُمي

خُطَّ حروفَ الماسِ وغرِّد .. فلِأُمي تَكتُبُ ياقلمي *

لقنتُكَ من بوحيَ شعرا" .. ببهاءِ تفانيها قَسَمي *

وإذا ما رتَـبـتُ لـقــاءا" .. فسَأجعل من ظهري قَدمي *

حبوا" أقصدها بضلوعي .. وأذوقُ اللذةَ في ألَمي *

هذي أُمي كلُ غرامي .. وبِداَيَةُ عشقي في الرَحِمِ *
ـــــــــــــــــــــــــــــــــــــــــــــــــــــــــــــــ
باسم الوائلي&

وحق زينب فكَدتج

عذرا" لو نسيتج آنه في يوم * تره ابطعنات دهري حرت اشلها **

واجروحي او زماني صارن اسباك * كلما شِفت علَّه ايرد يعلّها **

وارد بمعالج اجروحي او عالجياد * وبقت روحي عزيزه واما اذلها **

أنا اتحملت من دهري اشكثر عوز * بس عوز الحنان افكاري شلها **

شل عقلي لَمَن عني خذاج ابعيد * وحرم روحي المحنّه اوحاجتي الها **

ظالم هالزمن عكَبج صفه اوياي * وكَلبي الدنيا من بعدج جفلها **

الزمن ماقبل من صحتيلي بسّوم * كَال اهموم وأفراحي كتلها **

احضنيني ابحنانج والله محتاج * وحق زينب فكَدتج والكفلها **

صدك حنيتج الدفتني الاسنين ؟ تراب القبر عن روحي عزلها !!

ياحيف امشي عنج هسه حزنان * وادموعي على الوجنات اهلها **

واكَفلي الزمن يمّه هذاك اوياه * يأشّر بيده عوف امك او خلها **

هذني اهموم بيدي اتعجبك اثكَال * الزمن تعبان يمّه من ثكَلها **

اعذريني ييمّه اولا تزعلين * الزياره ايطول مو عمدا" أجلها **

ـــــــــــــــــــــــــــــــــــــــــــــــــــــــــــــــــــــــــــــ
//باسم الوائلي&

انت الضوه

اريد أبني شعر وأغزل بالحروف ..
 واسوي بيت دافي من خيالي ..

وانت الوحدك التسكن ابهالبيت ..
واضوكَك كل حناني اوكل دلالي ..

وانسجلك بساط ابكلمة اهواك ..
ومن شوقي اوغرامي عرش عالي ..

واكَعدك عالعرش وإيحيطك البوح ..
 اشما تنظر حروف الحب تلالي ..

آني ادري غرامي البيك بإفراط !!
وحسبتك انت بدري بالليالي ..

وياشمسي ابنهاري اوكل الايام ..
 صرتلي انت الضوه وانت خيالي ..

لاتحسبني ابالغ والله معذور ..
لان ماكو مُحب مثلك وفالي ..
ــــــــــــــــــــــــــــــــــــــــــــــــــــــــــــــــــــــــــــــ
باسم الوائلي&

ثمن غدرك صغتني

خذت ذاك الجمال اوذيج العيون ..
وخذت كل العواطف والمشاعر ..

خذت مني دررهن ذيج الاسنين ..
ومن قصتي بكَت اجمل خواطر ..

انت اللي عفت لاتلعب اوياي ..
 لتكَلّي احبج لاتكابر ..

جنت انت الوفي جي مصلحه اتريد ..
ومن مكنك ربك صرت غادر ..

واختاريت غيري او صرت أنه ارشيف ..
وثمن غدرك صغتني اوصرت صادر ..

اسلبت حتى حلقتي اوخاتم الايد ..
كَلتلي اني اعوضج والله باجر ..

اردلج حُليتج وابكَدهه مرتين ..
وصدكَتك ولا شكيت ماكر ..

آني معدني صافي اولبن طيب ..
وانت معدنك للزين ناكر ..

مشه ذاك الجمال اوذيج الايام ..
وهج الوجنه طافي اوظلمه صاير ..

بس خلّي اعله بالك ربي موجود ..
وللمكسور كَلبه هو جابر ..

ولتظن الزمن ضحكاته للدوم ..
تره هم بيك تفتر الدواير ..


والسويته بيه ايصير وياك ..
 مثل ماحيرتني اتكون حاير ...


لاتحسب محبتي قلّة ادراك ..
ولاتعتبر غدرك فعل شاطر ..
ـــــــــــــــــــــــــــــــــــــــــــ
..باسم الوائلي..

يحبني بالتقسيط

ضميته ابحضن روحي . وبين اعيوني والجفنين حطيته ~

وملَّكته الكَلب تمليك . يعني ابإختصار ابإسمه سميته ~

لان شفت التمسك بي . صرت آنه مرامه وآنه أُمنيته ~

كَلت هذا نصيبي الزين . ما حصّل محب مثل الذي الكَيته ~

لاتفرح يهالقاري . اسمع كيف صار اوياي تاليته ~

صار ايحبني بالتقسيط . واني دفعه وحده ابعمري اشريته ~

صار اوياي جن طاووس . بس ريشة غروره عني خافيته ~

ها يالقارئ اغتاظيت ؟ أزيدك بيت عن امواج نفسيته ؟

جان ابكل وكت مرسال . ويزعل لون ردي ابهيده وديته ~

هسه اتمر عليه ايام . ارسل مايرد اويدري تانيته ~

جا قطره العشك من ماي ؟ ويتبخَّر اذا بالشمس خليته !!
ـــــــــــــــــــــــــــــــــــــــــــــــــــــــــــــــــــــــــــــ
//باسم الوائلي&

لاتنغر حذاري

اكَلك لايغرك بيض الاوجوه ..

تره ابعمري شفت آلآف بيضان ..

ومن تدنه الفردهم تنصدم بيه ..

بالظاهر بشر والمخفي ثعبان ..

ابحث عن معادن واصل هالناس ..

ولاتنغر حذاري ابحلو الالسان ..

اخذ هاي النصيحه او عوفني او روح ..

اوعود اذكر كلامي اوكَول غلطان ..

خذت كثرة دروس ابهاي دنياي ..

ومن كَد الدروس اوكَعت تعبان ...
ـــــــــــــــــــــــــــــــــــــــــــــ
باسم الوائلي&

اتمايز جمالك

حلو لمن نروم اثنينه الفد شي * والجمهور كلمات العشك تنظر **

وحلو ذاك اللقاء العانه مُر اسنين * ومكَيوله الظفر من حصة اليصبر **

تسألني انتلاكَه اشوكت يالمحبوب * عجَب نفسه سؤالك بالفكر يفتر !!

لا .. وارجف بعد لمن افكر بيك * والحيره ابلقائك اعتقد تكثر **

لان من يوم اشوفك تدمع العين * دمعه الجيتك والدمعه تتغيّر **

لو مر عالفكر هم تمشي عني اتروح * إذا غيّبك ظرفك والبعد أسفر **

وانت ابين اديه تركض الساعات * وآني ادري الوكت كلما حلو ايمر مر **

يومي اوياك راح ايكون بالساعات * والساعات باللحظات تتبخر **

ياعطر الحنان اويا معاني الطيب * يعطر البيك حتى امنالعطر أعطر **

اكيد ابيوم اشوفك ابقه دايخ بيك * واتمايز جمالك ياغصن أخضر **

من عيني اخاف الحسد والله اعليك * وارتّل بالفلق والناس عن الشر **

مو آنه اسمعت مايحسدون المال * إلا اصحابه يعني من عيوني احذر **

احذر واوج حرمل لاتصيبك عين * لان انت اليشوفك بالهوه يعثر **

واكيد اثنينّه أذانه بجي الشوك * واكيد انشوف خط فوك الوجن احمر **

ما خلّي لقائي بيك بالختلات * كَدام البشر بيك امشي بيك افخر **

وما اريدن ستر يحجبنا عن الناس * لان ستر الضمير امنل ستر استر **باسم الوائلي&

احاجيك ابجروحــــي

انت أرض الخير واول حرف بيك ايصير عيد **
ورائك الراعي انت النه والألف أثبت عضيد **

وقافك القوه البصدري ولاجلك اتحمل واهيد **
وصرت احاجيك ابجروحي وانت تعرفها اشتريد **

ياعراق الخير ضمنه الحضنك الدافي نريد **
ذوله اعدائك ولونه وسيلوا دم الوريد **

طفل هذا يصيح بويه وذيج تبجي ام الشهيد **
ليش حتى المن ترابك صفوا للضدك عبيد ؟؟

ليش هذا يصير ليش ؟ وريت تعذرني اعيد **
من جمر كَلبي اسولف غيرتي اعليك التزيد **

اتزيد من عتبي عليك او ادري كَلبك مو سعيد **
واليحبك دوم يعتب هلبت اعتابه يفيد **

ــــــــــــــــــــــــــــــــــــــــــــــــــــــــــــ
//باسم الوائلي&

** باســــــــم الوائـلــي **: تتقطّع اقلوب

** باســــــــم الوائـلــي **: تتقطّع اقلوب: http://www.facebook.com/photo.php?v=149155761924332&set=vb.100004897271729&type=2&theater

تتقطّع اقلوب

http://www.facebook.com/photo.php?v=149155761924332&set=vb.100004897271729&type=2&theater

{ بصمات عشقي }

هنيئا" لتلك الوسادةٍ !!! التي طالما حالفها الحظ حين ترنّح خدك عليها يمينا" وشمالا ..

فهل لي أن أقترضها منك قرضا" حسنا ؟؟ لا لأنام عليها .. بل لعلّي اجد بصمات تلك

البشرة الرقيقة فأرسمها !! وأسميها {بصمات عشقي} ............... باسم الوائلي

{ لكنك بين قافي وبائي }

كم هم حسدوني ؟ ولعشقي لك انتقدوني ؟ فأجبتُ بنظرات عيوني ... هذا جنوني هذا جنوني !! بعيد عني وهو كذلك .. اكذوبة مكان ، وفترة زمان ، لكنك بين قافي وبائي ، لامي انت !! لكنك انت نسيم هوائي ، عبير أنت ........ اتجاهل ماكانوا يبغون .. وبصوتك أمحو مايحكون .. فيك هيامي ، فيك وئامي ، إليك شجوني ، هذا جنوني هذا جنوني ............باسم الوائلي 

شيب البعد

على الظاهر الوادم مايعرفون *شيب البُعد هذا الّي غزاني *

 تجعّد هالوجه ركّن هالعيون * وياحيف اكبرت من غير اواني *.....باسم الوائلي

تذكر

ليش اتعوفني ترضى آنه اجافيك ؟
                                         

تذكر من تكَلِّي موت هجرك ؟؟؟؟؟

{الوفا ابحزني}

صديق اويالحزن من زغري لليوم **

ماحبه لجن يعجبني وفّاي **

دعيت الله عليه ايزيله للدوم **

شو ردلي ابشغف هالحزن عنّاي **

يارب الجلاله هااا يَقيّوم **

أريد الوفا ابحزني ايصير بهواي **

//باسم الوائلي&

أرد ليك

خل ترتاح روحي اوعود أرد ليك **

بس انطيني مُهله اشويه أتنفس **باسم الوائلي

{ هل نسيتي ؟ }

أما لطيفك من لحظة واقعية ؟؟ المسها أتحسسها !! أستشعر نعومة روحك ، ودفئ وجودك ،

 سيدتي أيُّ سعادة هذه بغياب روحي ، وإنهيار صروحي ،

 ألم تتذكري قولي لك بأن بعدك أجهدني !! وعلى فراش العاشقين أقعدني ؟

 ألم أقل هذا ؟ فكيف بك الآن وقد إستسلمت مشاعرك ، وذابت آمالك ... 

وهاأنت تفصحين بعدم بلوغنا لبعضنا .. هل نسيتي انك مصدر قوتي ، وبقائك معي روعة سلوتي ؟

 تعسا" لهذه الحياة التي تخلو من نصرة عاشقٍ مقعد الروح ........... باسم الوائلي .

(وهم وردي)

أتحداك تنطق آنه احب غيرك .. واتحدى الخلك نفس التحدي *

وأتصدى المحبتك دومي موجود .. بس شوماشفعلي هالتصدي ؟؟

إجيت انت عالعاده ونفس الاوهام .. لجن هالمره وهمك وهم وردي *

تسولف عن محبه اوعشق واشواق .. وعلى انّي صور صرت اطي واهدي *

خلوق آنه ابتسم في وجه الاحقاد .. فكيف اوجوه عرفوا قدر وِدي ؟

مريض انت اودوائك مختصر هاك .. (عوف ادروب التجيب او تودي )*

كملّنا علاجك خلّي الإعتاااااب .. هاك انوب ركّز واملي سردي *

ماكَلك فريد او مثلي مفقود !! بس نادر وفا الموجود عندي *

والنادر أنا واشوارب اوزود .. يوكَف شاربي لو خنت وعدي *

,,,,,,باسم الوائلي

{ روح اختار غيري }

تتلذَّذ اذيتي اوحِرت تختـار * جنّك كَاعــد اكَبالك أنـاتيك **

وايعجبك عذابي ابكل وكت صار * مَيعجبك كلامي اشمااحاجيك **

شفت انت محب بالغصب يختار ؟ اذا شاء القدر سلِّم أياديك **

ماجبرك عليّه وماني جبّار * اذا كلبك الغيري صُبح هاديك **

تِمدحه انت إليه اشلون ماغار ؟ نار اشعلت بيه الله اليجازيك **

لاريب ابفلان او فايف استار !! وعن باسم اوزينه حظّه عاميك **

فضلته عليّه او اججت نار * بيها احركَت روحي اوصفت ذاريك **

{روح اختار غيري}واسكن ابدار * ويادار الغدر ؟ جا هذا تاليك ؟

جدرانه شكوك اوسقفه منهار * وبأشباح الخيانه الخوف ماليك **

ظنيتك نسايم وانت إعصار !!! وإعصارك كَضاني اوصرت أناديك **

ولف وين المحنّه ودمعك اعبار ؟ او وين الماابيعك والله شاريك ؟؟؟

بحر حبك تبخَّر ظلت أحجار * ورمال إعصارك أحجارك اثاريك **

ــــــــــــــــــــــــــــــــــــــــــــــــــــــــــــــ
باسم الوائلي ;;;;;;;;ليتها تروق لكم احبتي

{ عذبني غرامك }

عجيبه اشلون روحك تحرق الروح *

اوقلبك مايمل من شلع القلوب ؟*

مثل توم آند جيري تلعب اوياي *

حتى اعلى السقف سويتلي ادروب *

احاجيك ابسلاسه اورِقّه وإحساس *

وميَّزتك على الكل مو ؟ يَمحبوب ؟*

انت ابداخلك تعرفني ولهان *

بس طبعك صعب من عنده مَ اتوب !!

ماعافوا طبعهم أهل الاطباع *

وماينلم الماي الصبح مسكوب *

(تعبني غرامك) ذبني أشلاء *

وخلى القلب للكل بادي معيوب *

وإلمِن دم إلك خطيته وادموع *

مثل واحد كتب عالماي مكتوب !! ........باسم الوائلي&

( هاك روحي فدوه اخذها )

بويه كيف اتروح عنّي * انا البضعه اوياك اخذنّي **

بويه مااطيقن افراكَك يارسول الله الامين *

ترضى عكَبك يبقى صوتي للنياح او للانين *

بضعتك انه يبويه اوليك ياخذني الحنين *

بيك نور اسنيني جانت ترضى تظلم السنين ؟*

بويه شوف ادموعي ذنّي * حركَن اجفوني او عمنّي **

العفى اعلى الدنيا بعدك ريت روحي الي تروح *

اومن بعد عينك يبويه خلها تكتلني الجروح *

انه فاطمتك بتولك يا صرح واعلى الصروح *

ترضى بويه ايزود همي وارتدي الاسود وانوح *

يا حبيب الله إلك ونّي * وفرد جيه احزاني إجنّي ** 

طلّتك ذيجه تسرني يا ابو الطلّه البهيه *

جنت تجليلي همومي ابنظرة اعيونك عليه *

وانت الإختاريت حيدر والنعم من كفؤ اليه *

هذا حيدر ابو الغيره ليش كبلّته ابوصيه *

وحاله من بعدك شغلني * وحزنه بويه اعليك سلني **

ياحبيب الله اورسوله آني من بعدك اموت *

والحياة اخلاف عينك ظلمه جنها ابطن حوت *

بويه اترجاك تبقى مابقى من بجيي صوت *

بويه انفاسك الطيبه أصبحت ليش ابخفوت ؟

همومي واحزاني دِهنّي * ابخمدة انفاسك غزنّي **

بويه فاضت عني روحك صعدت الربها الجليل *

موقف افراكّك تِعبني والله هَد جسمي النحيل *

هاك روحي فدوه اخذها ايصير عن روحك بديل ؟

يارسول الله إبُّعادك قلب اليحبك عليل *

وآني احزاني سبنّي * وِليَه يابويه ولنّي **
ـــــــــــــــــــــــــــــــــــــــــــــــــــــ
باسم الوائلي // أسألكم الدعاء بشفاء المرضى (آجركم ربي)