انا البكّاء فاركَني الفرح دوم * وصور طف كربلا سكنت افكاري **
شَرد انسى المواقف كلها عالبال * وبصمات الألم صارن شعاري **
شفت كثرة مواقف يوم الاطفوف * وأكو موقف المنهن إنشطاري **
يوم النادى ابوي او نبّه الكَوم * وماصح منهم الهالوعظ شاري **
واجه منهم جواب ابرمي الاسهام * وعليهم لنّه دمع احسين جاري **
ورد والدي لينا وكله مهموم * ونادى ياخوتي واهلي وانصاري **
رسل هالكَوم اجتكم شفتوا الانبال * إسمعوا مني واتلقوا قراري **
في حل انتوا مني وماكو كل ضير * وابإخلاصكم زين آنه داري **
رفضوا كَالوا ارخصنا يالحسين * بس للمعركه مو للديارِ ي **
احنا اوياك ماشين ابدرب موت * إمام اوطاعتك طاعة الباري **
وضحوا كلهم ابعز ذيج الأرواح * ومصارعهم فرت دلالي اثاري **
وياعيني يالأكبر طبرتك ذيج * اندهتّني اوعلِّتي اتعوق انتصاري **
وسلام الله على مكَطوع الاجفوف * اوسكنه اتردد العمي انتظاري **
واعد كل طفل يرجعله بالماي * بس الماي أخذ ليث البراري !!
وتعنّه والدي صوب النهر ليه * وهتف عباس يالبيك انكساري **
وسِمعَت صوت عمتي اوصاحت إشلون ؟ طايح كافلي اوعامود داري ؟
وكَوا واحد بأثر واحد هالابطال * واجه دور ابو اليمّه وانهياري **
ومن سهم المثلث بالقلب طاح * أحسَّن بالسهم لقليبي فاري **
وهوى ابعيني أشوفه اوطاح ع الكَاع * والميمون صاح الثار ثاري **
عله بيهم صهيله او عاود اردود * بس السرج ملوي او اجه جاري **
طلعت زينب اومشدوها واتصيح * ها ميمون وين اضحى إزدهاري ؟
يكَلها احسين قلبه انقسم نصّين * وراسه اعلى الرمح شوفي .. يباري !!
صاحت واحسينا"واحسيناه * ياحاميلي خدري اوياخماري **
وشفنا اخيولهم ع الصدر رضّوه * وانمزجت اوصاله ابرمل ذاري **
وشفت ألعَن بشر !! صاح اضرموا النار * بخيام الحسين إشعِلوا ناري **
وهجَّت هالنسا وفرَّت هالاطفال * هامت عالوجوه ابهالصحاري **
وجمعنه الي جمعنه اوراح مَن راح * وصبّحنا يساره ابضعن ساري **
وآنه ابعلّتي امعالج اويالروح * ورافقني المرض والحزن جاري **
لذلك دمعتي مانشفت ابيوم * وأنا البكاء الى حَد إحتضاري **
ــــــــــــــــــــــــــــــــــــــــــــــــ
باسم الوائلي // نسألكم الدعاء بشفاء المرضى
