اضحك اترجّاك

اترك آلآمك وإلي خليها ..
شيل احزانك عليه ارميها ..

هاحبيبي سولف اشعندك هموم ؟
ها يكَلبي إحجي ما عوفوك تكَوم ..
تدري من تحزن تكَوطر هالغيوم ؟

واشعر ابدنياي مدري اشبيها ..
شيل احزانك عليه ارميها ..

ذني دمعاتك انشفهن بديه ..
وآخذ الهضمات من عندك هديه ..
انت ماتدري اشكثر تعني إليه !

انت عيني ونور اليضوِّيها ..
شيل احزانك عليه ارميها ..

آني من طبعي احسّن بالغريب ..
شلون واعيونك اكَبالي يالحبيب ؟
والله اقراهن وهذا مو عجيب ..

واعرف اهمومك اشلون امحيها ..
شيل احزانك عليه ارميها ..

العشره ماتنفع اذا ماكو شعور ..
وانت ساكت فكرك ادري اشبي يدور ..
بحزنك احزن وافرح إن صابك سرور ..

هاذي روحي بروحك امسدّيها ..
شيل احزانك عليه ارميها ..

اضحك اترجاك خل امري يسير ..
تدري بسماتك يخلَّني اطير ..
وبيهن اشتم احلى نسمات العبير ..

وانت بيدك دنيتي تزهيها ..
شيل احزانك عليه ارميها ..
~~~~~~~~~~~~~~~~~
باسم الوائلي&ليتها تروق لكم أعزائي