{ خِدشت انت الصداقه }

شتريد أحجي عنك؟ مُتعب اهواي *

حتى العتب مل من الاعادات *

كافي اتمثل ابدور اليحبون *

قابل فلم هندي وبي خرافات *

غلطان اني اوصفك توفي متخون *

انت اسطوره صاير بالخيانات *

وصفتك بالحنان ودفء الاحضان *

اتضحلي اسنين كلبك صار من مات *

لأن كل حرف منك سهم مسموم *

يحمل طعن منك بي شعابات *

بس خلي اعلى بالك شي لتنساه *

بعد متثيرني هاي السخافات *

تِجاوز خوّتي وإسحك على الروح *

وخلي بكل جرح بإسمك علامات *

الخرق مو بس إلي  واتحمل اوعاد *

خِدَشت انت الصداقه بهل خروقات *

تغافلني ابصلافه ليش يفلان *

وي ناس  البكَلبي اتبث علاقات *

وابقيت انه صافن والله محتار *

تصدر مني صديقي هالإهانات *

ماينفع كلامك بطّل اوروح *

خَذِت صك بالوفه منهم واجازات *

ــــــــــــــــــــــــــــــــــــــــــ
باسم الوائلي //    جُل احترامي لكل وفي

العز

أرى ان العز كالماء الذي في الإناء ... فإذا كُبَ الماء فيصعب بعد ذلك إسترجاعه كما كان!!باسم الوائلي

معايدتي لأحبتي

عيد الله الأكبر حل علينا *  صلّوا على طه نبينا *

طير السعد لاح * ونتباشر افراح *

ياربي حقق أمانينا * صلّوا على طه نبينا *
**     **       **
ياربي حقق أُمنية كل شخص هالعيد *

بجاه النبي وآل النبي وصدق المواعيد *

وسدّد خطانا اعلى العدل وإهدينا مَنحيد *

ونمشي اعلى درب المصطفى والإيد بالإيد *

**     **       **
ونتبسّم ابوجه اليجينا * ونستقبله اورود ابإدينا *

وانكَلّه هلّيت * ياسيد البيت *

يلّا انتِبادل تهـــانينــــا * صلّوا على طه نبينا *

ـــــــــــــــــــــــــــــــــــــــــــــــــــــــ
باسم الوائلي //أسألكم الدعاء

( حوار العيون )

قالت :هذه نظرات عيناي لن يستطيع ان يفهمها إلا فنان الوانه ممزوجة بريشة وقلم ! حسٌ وفكر...

الا تقرأ الحزن في عمقهما .. بسمة تشق طريقها وسط دمعة .

قلت :قرأت مافيهما فراحت عيني تغوص بماء الدمع .. الذي لم يُذرف بعد .

قالت :ارها عين فنان ... حسٌ مرهفٌ ... وفكر متطلع لافق بعيد !!

قلت :ماهي إلا نظرة مجنون انطوى على حرفٍ ولون ...

وعيناكِ اجد فيهما كل الكون كل الكون .

قالت :وانا في نظرتك احس انك تقرأُني وتحفظني هناك .

قلت :نعم وأجدت في قرآءة شخصكِ ايضا" !! بل اطلعتُ على كتاب روحِك من الالف الى الياء .

قالت : احسُ بذلك واحسُ أنكَ ابدعتَ في ان تلم شتاتي .

قلت لها وختمت معها (حوار العيون ): تلقائيا" صرت مهاري .. ولمستُ بعينيكِ قراري ..

 فستزهو بعينيَّ حياتي .. فأنتِ أنتِ جمعتي شتاتي .

ـــــــــــــــــــــــــــــــــــــــــــــــــــــــــــــــــ
باسم الوائلي //

( ايها الحاضر الغائب )

تحية مني لك ايها المسؤول ... اينما كنت !!!

في أي مكان من مكتبك المكيَّف ، المنوّر ، بالنور المصنوع ...

لطفا" أيها ( الحاضر ) هل لي من وقتك الياقوتي بنظرة صغيرة ؟

إسمعني أرجوك أيها ( الحاضر ) ... ولا أريد السماع منك فقط ، ولا أريد غير حقي

وحق أبنائك من طلّاب وطالبات !! ( نحن نريد مدرسة ) أسوة يأقراننا من العالم المتطوّر ( مركز المدينة )

فإذا رَدَدتَ عليَّ ب ( صه ) سأقول لك شكرا" أيها ( الغائب ) !!!.

ـــــــــــــــــــــــــــــــــــــــــــــــــــــــــــــــــــــــــــــــــــــــ
باسم الوائلي //

ليلة الجمعة

ليلة الجمعة احبتي ..ولكم مني:
ـــــــــــــــــــــــــــــــــــــــــ

زوارك يَحسين .. متعنيه زوارك *

كل المحبين .. تجذبهم أنوارك *
*     *      *
يحفظهم الله امنل بله * قصدوا إزيارة كربله *

**        **        **
متعنيه الجموع اتريد توصل حضرتك يَحسين *

وتستنشق عبير الطيب من دمك الاحيا الدين *

بيقين اصدورهم قصدوك هالعشاق متعنّين *

ابحماسه اوشغف طبتهم وابنشوة فرح كل حين *
*         *            *
هتفوا مجانين .. جينا لَعِد دارك *

ياقرة العين .. ذوله احنا خطارك *
*     *      *
وكلمن ابصدره مسأله * قصدوا إزيارة كربله *

ــــــــــــــــــــــــــــــــــــــــــــــــــــــــ
أسألكم الدعاء لشفاء المرضى // باسم الوائلي //

{ انطقن يانجوم الليل }

يحاجيني ابرود اعصاب وآني اعصابي تلفانه *

ويكَلي عليك الروح يالمحبوب ولهانه *

شو وينه الوَلَه كَلّي ؟هاي اعيوني ذبلانه *

وانت اعيونك ايلمعن والوجنات ريّانه *

بجي يوسف بجيت اعليك من غدروه خوّانه *

ولو تنظر دمع عيني اكسر خاطرك آنه *

تنام اعيون كل الناس وآني اعيوني سهرانه *

واحاجي ابّعدك النجمات وابنظرات حيرانه *

انطقن  يانجوم الليل ياحلوات بِسمانه *

بلكي وحده من وحده الخبر يوصلّه اعلانه *

ينجم اسهيل احلفنّك بالله وبحق قرآنه *

انقل حالتي بإنصاف لاتوصلّه نقصانه *

ورجعلي الخبر منّه وانتظرك تره اهنانه *

احمل ، انتظر ، ماشوف ، وشوف اعيوني نعسانه *

واصجّع كمت جي تعبان حتى الروح هلكانه *

ومن كَد ما اون بالليل بيتي خسر جيرانه *

ينجم اسهيل شو عجّل والله الحاله تعبانه *

ها !! بيَّن عليه اسهيل ويّاه الخبر جانه *

يكَلّي الي عفت دنياك لعيونه اوعلى شانه *

سألت اعليه ماموجود غيَّر حتى عنوانه *

ــــــــــــــــــــــــــــــــــــــــــــــــــــــ
باسم الوائلي // اتمنى ان تروق لكم اعزائي

{ بطران الحكيم }

يشكيلي إبألم لمن زعلت اعليه *

 مايدري الألم اضعافه مر بيه *

يكَلّي الفكر مني تايه او مشغول *

 مايدري السهو راودني بالنيّه *

يسولف عن مرض بي من زعلت اوياه *

 واحواله تردَّت ميه بالميّه *

الحكيم الشافه مذهول اويكَلّه اشبيك ؟

علّه البيك ذهلتني او خرافيّه *

هالحاله غريبه او ماسدت ع البال *

 افصح عن شعورك وضّح اشويّه *

مايدري الحكيم  العلّه والمعلول *

حدث بيني خلاف اوبينه عصريّه *

كَتله الصار بيك ابنفسه صار اوياي *

بس آني عنيد او اكتم اعليّه *

ما كتّن اهمومي الشخص مهما كان *

كتوم اوهالكتوم انفضح تاليّه *

فضحتني دموعي اوطيحتي ع الكَاع *

انا ساكت اوعيني ابدمع مسبيّه *

اجا يمي الحكيم او يحجي باخفت صوت *

شكلوله مغذي اوقصص طبيّه !!

بطران الحكيم العلّه تخفى اعليه *

مايدري ابمنامي اوعندي مجليّه *

مايدري الحكيم المثل من كَالوه *

الشعاب ابمكه للسكنوها مقريّه *

وآني ادرى باحوالي وافهم الي صار *

عيونك علّتي والدوى هم هيّه *
ــــــــــــــــــــــــــــــــــــــــــــــــ

باسم الوائلي // ليتها ترتقي لِمستوى ذوقكم الرفيع

( اجا ايكحلها اوعمى العين )

حذاري اتكَول عاشق إرحم العشاق * كذّاب انت وينك والعشق وين ؟

قداسه العشق بي تتفاخر الناس * بس انت ابغبائك دسته بالطين *

بطّل عوفه مو دربك ولك روح * وال عالشام دربه اشجابه عالصين *

هذا الكَلب منك شوفه مجروح * بسهامك شطرته اوصار نصين *

شو عوف الغرام اكرمني بسكوت * خايب وينك او وين المحبين ؟

المحب فعله اوكلامه امطابق ايصير * وانت الزين عندك تجرح الزين *

بيك اجمل صفه اتّاجر بالكَلوب * جا عيبك اشلون ايصير بعدين *

إمنع نفسك او كف عن الاشواق * واتجنب خداع الناس كل حين *

ترى العاشق محبّه اوصدق واخلاص * ابوزن فعله اوكلامه ارقى الموازين *

وانت اتشيل من هذا اوتحط ذاك * مثل الاجا ايكحلها اوعمى العين *

العشق شرطه الوفا عند اليحبون * وانت الوفا عندك طعن سكين !!

العشق طابع سماح ايغطي العيوب * لذلك سمّوا العشقوا مجانين *

ــــــــــــــــــــــــــــــــــــــــــــــــــــــــــــــــــــــــــــــــــــــــــــ
// باسم الوائلي // ليتها تشفي غليل المجروح

رحلة سفر

هل لاحظتَ نفسك عندما تنوي السفر لبلدةٍ ما ... أنك تَوَد إصطحاب مَن تحب في سفرك ؟؟

كذلك هي الدنيااا !!

فاصطحب مَن يعتبرها مثلك .. أنها رِحلة سفر ! منتهية ببدايةِ الآخرة .  //باسم الوائلي //

يَ شباك

يَ شباك اشكثر منك تحاكينا *** وليل الشتا بلحظه من يمر بينا ***

 ماناسين والله امشابك إيدينا *** يَ شباك او يمانع كل بلاوينا ***

//باسم الوائلي//

تغمرني ابحنان

يانبعة شعور وغصن إحساس * ياوردة محبه الشوق ماليها *

وعطر الطيب اشم من عدها انفاس * وتغمرني ابحنان اوراقها البيها *

إذا كان الصبر مفتاح ينقاس * حياتي ... بيدج المفتاح احكميها *

اضربت في وصفي الج اخماس بأسداس * اريد اوصف ابروحج كل معانيها *

 تالي الكَيت نفسي ابساحل الياس * وامواج اتلاطم ... روحج شبيها !!

المثل مكَيول طاح الفاس بالراس * وآني راسي طاح ابطرف شاطيها *

اخط بيج الكلام إترن الاجراس * مالحّك الحصه ابسرعه نكّضيها *

وبالفرصه تسولف ناس وي ناس * وآني الفرص كلها كَتلج اخذيها *

ــــــــــــــــــــــــــــــــــــــــــــ
//باسم الوائلي // ليتها تروقكم اعزائي